Хочуць размеркаваць у вёску. Як застацца ў сваім горадзе?

У першую чаргу трэба праверыць, ці не адносіцеся вы да адной з катэгорый выпускнікоў ніжэй. Калі ні да адной з катэгорый вы не адносіцеся, то як варыянт паспрабаваць дамовіцца з адміністрацыяй аб размеркаванні на месца працы ў сваім горадзе (калі ёсць свабодныя вакансіі ў спісах для размеркавання) альбо прынесці індывідуальную заяўку (шанцы вышэй, калі там была пройдзена пераддыпломная практыка).

Якое агульнае правіла?

У заканадаўстве няма правіла пра тое, што размеркаванне павінна ажыццяўляцца толькі па месцы рэгістрацыі (правільная назва прапісцы).

Па агульным правіле, месца працы для выпускнікоў у ходзе размеркавання вызначаецца навучальнай установай самастойна з улікам наяўных заявак і заключаных дамоваў аб узаемадзеянні (ч. 9 арт. 72 Кодэкса аб адукацыі).

Заканадаўствам прадугледжаны выключэнні для наступных катэгорый выпускнікоў:

Дзеці-сіроты і дзеці, якія засталіся без апекі бацькоў, а таксама асобы з ліку дзяцей-сірот і дзяцей, якія засталіся без апекі бацькоў

Такія выпускнікі размеркоўваюцца:

па месцы замацавання за імі жылых памяшканняў, альбо
па месцы ўключэння іх у спісы ўліку тых, хто мае патрэбу ў паляпшэнні жыллёвых умоў, альбо
па месцы першапачатковага набыцця статусу дзяцей-сірот або статусу дзяцей, якія засталіся без апекі бацькоў, альбо
з іх згоды ў іншым населеным пункце.

Дзеці-інваліды ва ўзросце да васемнаццаці гадоў, а таксама інваліды I або II групы

Такія выпускнікі размеркоўваюцца:

па месцы жыхарства бацькоў,
па месцы жыхарства мужа (жонкі) альбо
з згоды выпускніка ў іншае наяўнае месца працы.

Асобы, якія маюць аднаго з бацькоў, апекуноў або мужа (жонку) інваліда I або II групы альбо дзіця-інваліда ва ўзросце да васемнаццаці гадоў

Такія выпускнікі размеркоўваюцца:

па жаданні выпускніка і пры наяўнасці магчымасці працаўладкавання па месцы жыхарства гэтых бацькоў, мужа (жонкі), дзіцяці-інваліда ва ўзросце да васемнаццаці гадоў, альбо
з згоды выпускніка ў іншае наяўнае месца працы.

Асобы, якія маюць медыцынскія супрацьпаказанні да працы на асобных пасадах служачых, па асобных прафесіях рабочых

Такія выпускнікі размеркоўваюцца з улікам стану іх здароўя.

цяжарныя жанчыны

Такія выпускніцы размеркоўваюцца:

па іх жаданні і пры наяўнасці магчымасці працаўладкавання па месцы жыхарства бацькоў, мужа альбо
з згоды выпускніцы ў іншае наяўнае месца працы;

Бацькі, апекуны, якія маюць дзіця ва ўзросце да трох гадоў на дату прыняцця рашэння аб размеркаванні

Такія выпускнікі размеркоўваюцца па іх жаданні і пры наяўнасці магчымасці працаўладкавання па месцы жыхарства аднаго з бацькоў, апекуноў дзіцяці;

Муж (жонка)

асобы, абранай на выбарчую пасаду служачага ў дзяржаўныя органы, альбо
асобы, накіраванай на працу ў дыпламатычныя прадстаўніцтвы або консульскія ўстановы Рэспублікі Беларусь, альбо
асобы з ліку вайскоўцаў (акрамя вайскоўцаў, якія праходзяць тэрміновую ваенную службу, службу ў рэзерве, альтэрнатыўную службу, курсантаў),
асобы з ліку супрацоўнікаў Службы бяспекі Прэзідэнта Рэспублікі Беларусь,
асобы з ліку ваенізаваных арганізацый,
асобы з ліку органаў дзяржаўнай бяспекі,
асобы з ліку мытных органаў,
асобы з ліку пракурорскіх работнікаў

Такія выпускнікі размеркоўваюцца па іх жаданні і пры наяўнасці магчымасці працаўладкавання па месцы працы, праходжання службы (у т.л. ваеннай) мужа (жонкі);

Муж (жонка), у якіх муж (жонка) працуе і пастаянна пражывае ў Рэспубліцы Беларусь

Такія выпускнікі размеркоўваюцца па жаданні выпускніка і пры наяўнасці магчымасці працаўладкавання па месцы жыхарства або працы мужа (жонкі);

Заўвага: даволі распаўсюджаная практыка. Пры гэтым трэба ўлічваць, што заключэнне фіктыўных шлюбаў цягне за сабой іх несапраўднасць, калі гэтая інфармацыя выяўзіцца. А яшчэ гэта выключэнне не працуе, калі муж (жонка) пражывае за мяжой.

Муж (жонка), якія размеркоўваюцца ў адзін каляндарны або навучальны год

Такія выпускнікі размеркоўваюцца па іх жаданні і пры наяўнасці магчымасці працаўладкавання ў адзін населены пункт.

Дзеці асоб, указаных у падпунктах 3.2, 3.4 і 3.7 пункта 3, пункце 10 і падпунктах 12.2 і 12.3 пункта 12 артыкула 3 Закона Рэспублікі Беларусь «Аб дзяржаўных сацыяльных ільготах, правах і гарантыях для асобных катэгорый грамадзян», г.зн. дзеці вайскоўцаў і супрацоўнікаў унутраных спраў і дзяржаўнай бяспекі, якія сталі інвалідамі або загінулі пры выкананні (больш падрабязна ніжэй)

Такія выпускнікі размеркоўваюцца пры наяўнасці магчымасці па месцы жыхарства бацькоў, мужа (жонкі) выпускніка альбо з яго згоды ў іншае наяўнае месца працы.

Больш падрабязны спіс:

вайскоўцы, якія сталі інвалідамі ў выніку ранення, кантузіі, траўмы або захворвання, атрыманых пры абароне Айчыны або выкананні абавязкаў ваеннай службы ў дзяржавах, дзе вяліся баявыя дзеянні;
асобы начальніцкага і радавога складу органаў унутраных спраў і органаў дзяржаўнай бяспекі, якія сталі інвалідамі ў выніку ранення, кантузіі, траўмы або захворвання, атрыманых пры выкананні службовых абавязкаў у раёнах баявых дзеянняў;
работнікі, якія абслугоўвалі дзеючыя ваенныя кантынгенты ў Афганістане або ў іншых дзяржавах і сталі інвалідамі ў выніку ранення, кантузіі, траўмы або захворвання, атрыманых у перыяд вядзення баявых дзеянняў;
грамадзяне, у тым ліку звольненыя ў запас (адстаўку), з ліку вайскоўцаў, асоб начальніцкага і радавога складу органаў унутраных спраў, Следчага камітэта, Дзяржаўнага камітэта судовых экспертыз, органаў і падраздзяленняў па надзвычайных сітуацыях, органаў фінансавых расследаванняў Камітэта дзяржаўнага кантролю, якія сталі інвалідамі ў выніку ранення, кантузіі, траўмы або захворвання, атрыманых пры выкананні абавязкаў ваеннай службы (службовых абавязкаў).
вайскоўцы, асобы начальніцкага і радавога складу органаў унутраных спраў, якія загінулі (памерлі) пры выкананні ваеннага або службовага абавязку ў Афганістане або ў іншых дзяржавах, дзе вяліся баявыя дзеянні, а таксама памерлыя ў выніку ранення, кантузіі, траўмы або захворвання, атрыманых у перыяд баявых дзеянняў, акрамя выпадкаў, калі гібель (смерць) наступіла ў выніку супрацьпраўных дзеянняў, па прычыне алкагольнага, наркатычнага, таксічнага ап’янення, членашкодніцтва або самагубства, калі яно не было выклікана хвароблівым станам або давядзеннем да самагубства;
вайскоўцы, асобы начальніцкага і радавога складу органаў унутраных спраў, Следчага камітэта, Дзяржаўнага камітэта судовых экспертыз, органаў і падраздзяленняў па надзвычайных сітуацыях, органаў фінансавых расследаванняў Камітэта дзяржаўнага кантролю, якія загінулі пры выкананні абавязкаў ваеннай службы (службовых абавязкаў), а таксама памерлыя ў перыяд праходжання ваеннай службы (службы) ў выніку ранення, кантузіі, траўмы або захворвання, непасрэдна звязаных са спецыфікай нясення ваеннай службы (службы), акрамя выпадкаў, калі гібель (смерць) наступіла ў выніку супрацьпраўных дзеянняў, па прычыне алкагольнага, наркатычнага, таксічнага ап’янення, членашкодніцтва або самагубства, калі яно не было выклікана хвароблівым станам або давядзеннем да самагубства.